RO PELAIRE SALAS

Por Pili Lisa Subías

363
relatos cortos en aragones

Ha siu, ye y será que ros ricos ra unica cosa que quieren ye, fer-se más ricos y por demás. Asinas qu’en una casa grande de Castiazuelo n’abía trabajando lo menos cuatro u zinco criaus; que si l’uno d’aquí, que si l’otro d’astí…  Y ros pobrons paezeban mulas de tantismo trabajar de lunes ta domingo y dende que saliba ro sol asta que s’en iba. Isto ye posible d’aguantar-lo bel tiemped, pero ros pobrons estaban aborrezius de tanto meneo, que tan luego bribaban como segaban y si no, a bendimiar y asinas siempre.

Con que se las apañón ta fer a faena de ros domingos lo más luego que podesen y por lo menos, descansar-se bel poco ise día. L’amo no tebena ni que enterar-se y asinas, no sentirían romanzes ni berían morro chuflo.

SUSCRIPCION

Con que sí, sí, asinas lo fizon y ra cosa iba marchando.  En isas, un domingo pasada ra Encarnazión, l’amo los mandó afajinar latazins ta ros conejos y les dijo: “Ay que fer fajos ta ros conejos. No tendred problemas que ro monte está abadinau de latazins. Y no bengad ta casa solo con medio carretillo, que joparéis cara t’allá pa fer-ne más. Traéisne pa no pensar bel par u tres de semanas…”

Que si quiés arroz Catalina: ¡domingo y doble plato sopa! Asinas, que ros criaus que teneban más cuculugía que ra rabosa Bacharrey, barruntón que pa fer os fajos luego, luego no teneban más qu’ir ta ro zimenterio que estaba plagau de latazins y fartar-se de afajinar…

A ro primero, tubon bella miaja de respeto por iso de meter-se en ro camposanto, pero entre que denguno era de ro lugar, que no penaban miaja por os qu’astí estasen enterraus y que teneban ganas de plegar… que t’astí s’en fuén como ros tronlirons.

Ro zimenterio estaba abadinau de latazins (ros bezinos asta primeros de Nobiembre no s’arrimaban gota) con que se puson a  ra faena. Ros mozos ni chistaban si acaso pasase alguno no los sentise y les echase l’agua. Chino chano, ros fajos subiban como ra espuma.

En isas, que por o camino beniba a pied ro pelaire de Salas Altas con ro tozuelo en ros asuntos que teneba que tratar en Castiazuelo. Barruntaba más que ros notarios,  iba dale que te pego que si isa biña, que si ras almendreras de ro Mon, que si mama que si papa…

Y en isas, ros criaus enzenegaus a ra suya, se les ocurre que t’alantar más, mejor abentar os fajos por a tapia de ro ziminterio ta ro camino y asinas, afuera ros recogeban y listo. En isas, agarran ro primer fajo, l’apretan espentón que lo echan a bolar por enzima ra tapia… Y t’al otro lau iba trón trón ro pelaire peñazero. ¡Miá! Asinas que sintió que le caeba en ra lomera bella cosa blandeta y chelada que beniba de aentro de ro ziminterio… agarró a correr cara Castiazuelo más aprisa que ro Chistabín Berbegal. Y grazias a ra Birgen de ra Candelera que ye todo bajadeta, que le toca garriar de subida y le pega ro zaguero mal.

En bel par de minutos se clabó en ra Plaza ande d’en seguida se dión en cuenta que bella cosa l’abeba pasau porque estaba blanco como ro toscón y tretolaba. Pensando que l’iba a pegar lo menos una perlesía, lo entrón ta una casa y lo subión ta ra cozina. Aún preto ta ra chaminera no reazionaba y no se l’entendeba gota de lo que deziba. L’apretón ta ras narizes un pañuelo con arcol y cosa. Asta un sopapo le pegón, y no.

Y en isas, clamaba: “Agua, agua”. Y le dión agua apañada con güena chorrada d’anís de Colungo. O beniba a güenas o se moriba, una de dos. Y que s’espabiló ro misache. Y atabalau perdiu prinzipió a contar lo que l’abeba pasau en ro ziminterio y todos s’espantón. ¿Teneban almetas en ro ziminterio u qué? Ro peñazero charraba, charraba pero sin parar de dar-le a l’agua, que l’aduyaba a soltar-se-le ra lengua.

Y d’ista istoria al final supon que ros criaus causon ro lío (¡güena s’armó en casa con l’amo!) y en Castiazuelo quedó un dicho: “Aún caldrá dar-te l’agua como a ro pelaire Salas” .

2 Comentarios

  1. Me fa prou goyo leyer n’aragonés.

    Miraz que no sea l’ultimo. Au pues ixa moza de Salas qu’escribonia, dica que no se gaste a tinta d’o boligrafo no en dexes de felo…

    • Grazias Fernando. No tengas miedo que me se terminen ros relatos. Ro lugar mío ye inagotable en istorias y falordias que iré replegando.
      Goyoso 2021 ta tú y ros tuyos desde Salas Altas!
      Pili

Dejar respuesta

Please enter your comment!
Please enter your name here