ECOEMBES COMARCA

En iste lumero de Ronda y en os beniens imos a charrar d’a obra literaria de Nieus Luzía Dueso (Plan, 1930-2010), chistabina de naxedura pero con radizes en Balbastro. Con doze años marchó d’a bal ta Algayón e continó a suya formación en Tamarite. En Balbastro estudió Bachillerato en l’Academia Cerbuna ta marchar dimpués a estudiar Machisterio en Uesca. Dende 1952 exerzió de mayestra en una catafila de lugars de l’Alto Aragón dica ra suya chobilazión en 1992. Dende ixe inte bibe en Balbastro en os meses de fredo e puya tara suya quiesta bal de Chistau en o estiu.

Ye a primera muller, que se sepa, que escribe en aragonés dende o sieglo XVII, en do lo fizon Ana Abarca de Bolea e Isabel de Rodas. Os primers escritos en aragonés chistabín los publica en o programa de fiestas de Plan y en o Llibré de Graus, en a decada de 1960 d’o sieglo pasato. Dende ixe inte, as suyas colaborazions en rebistas como Argensola (IEA) u Fuellas (CFA) asinas como en diarios son continas, e prenzipia a medrar a suya obra literaria. Al canto’l Zinqueta ye a primera obra publicata en aragonés chistabín, en 1980, por parti d’o Consello d’a Fabla Aragonesa. En a suya presentazión diz l’autora:

«Estes son es primés bersos en fabla aragonesa de la mía bida. Me faría goy que tos gustasen. Si paraz cuenta, podrez biere que cuasi toz son temas de la bal de Chistau. Las mías raízes chistabinas son a sabé qué fondas; per ixo, predominan per denzima de tot en lo que escribo.» 

Os nucleyos tematicos d’a obra son, en primer puesto as tradizions, leyendas, motibos tradizionals e folclóricos, con poemas como “A santa Luzía de Señés” u “Las Pasadas de Plan”. Un segundo rolde lo forma o paisache d’a bal, articulato por a Zinqueta, a ra que adedica “Oda al río Zinqueta”. O tercer tema ye a relichión, con poemas como “Billanzico” u “Le quiero cantare” e o cuarteno ye o motibo amoroso, en poesías como “Plebeba” u “La mía mozeta”. Reproduzimos un polido soneto amoroso:

Al rustil del sol

Al rustil del sol, la piel cremá…

La saya remangada á la ranera.

Cargando’l faixo garba, asta la era,

t’e bista, per La Suerz, esnabesá.

A tú no te paixeba, que mirabe,

cómo lebabas la carga la primera.

Y á garra cabo allegabas la zaguera,

más que t’al puesto anque t’asperabe.

¿Tendrás augua ta la sé que me permena?

¿la ixecarás, me deixarás morire?

¿Te’n pasarás per yo nenguna pena?

Si querrén, si tú quiés, podén mirare

es dos, un camín, chuntos, ta que biengas

ascare tú, con yo, la misma strela.

                                              Balbastro-Plan, chulio 1977

SUSCRIPCION

Dejar respuesta

Please enter your comment!
Please enter your name here