Adecco

No, no, ya te’l digo que pa café tapoco. Y fesme el favor de dixáteme de mirá con ixa cara, que’l estoy din en serio, hostia. Ya é buena pena que me i tienga que posá firme. ¿Qué no se m’entiende cllaro cuan habllo, u qué ha de sé esto?

¿Qué no te’l he repetiu ya tres u cuatro veces que no te torno a dixá perras? Ara que si un café, y l’atro día, ¿pa qué va sé l’atro día? ¿Y el d’antes, te’n acordas tú? Au, guarda qué te’n has d’acordá; como de tornámelo. Y díxame tranquilo que se m’enfría el cortau, que ya t’he dau prou conversa.

MONZON

Marcha, vesle a sacá cuartos a bel bonitatis que te i troves per astí, que con yo ya s’ha acabau. Chusto ixo é lo que soy, un bonitatis del que toz s’aprovechan. No, aspera, siente; del que toz s’aprovechaban. Pero anda aquí hen llegau, que no te i penses que es tú solo. No é pas cosa de un café ni de vente cafés, no, que no é ixo.

El probllema é que ya me’n he fartau de que me tomez per canelo, asinas te’l digo. Tú y los de demás. Y encara me tiengo que sentí a la mullé con ixo de que si en cuentas de sangre a las venas tiengo líquido de frenos, y que si de bueno a tonto nomás n´hay que un paso, y tot ixas retrólicas que me i solta. Oh, para, que no le i saco la razón, que si me’l diz, bella cosa habrá notau ella. A lo milló cal buscá per astí la radiz del probllema. Sí, ixo debe de sé, que per querí quedá ben me’n paso, y dimpués ya no n’hay manera de reculá. Y qué majo é sentime ixo de “ya pasarén cuentas cuan mos tornén a veyé”, “a primeros de mes, que habré cobrau, te’l torno”, “la semana que viene sin falta te llamo y el apañán”, “a la prósima te invito yo…”. Sí, los cullons.

A ve, ¿cuán m´has invitau tú? Ni tú ni nenguno de los que les he dixau perras, ni de los que me i deben los arriendos, ni de los que m’han ensorronau pa fé una faena a medias y encara no he visto un duro. Tos hez achuntau, pa desangrame, amigos como tú de los que m’he fiau, parientes que m’han toreau como han queriu, empresarios que se las campan ben con los dinés d’otri. Con toz se m’ha quedau la mesma cara de maduro.

¿Qué i llevo un cartel al tozuelo an diga “a este pedizle perras, que no caldrá pas que le’n tornez”? ¿Tan inorante pensaz que i soy? Y lo que más duelo me fa no son los dinés. ¿Pa qué los quiero yo los dinés, sino pa aduyá a los de demás? ¿No é ixo lo que he fecho to la puta vida? ¿No t’he aduyau siempre que l’has precisau? No, no son los dinés, que con los que tiengo ya mos ne sobra a la mullé y a yo. ¡Si no mos los hen de sabé llevá ent’allá alto! La economía no lo’n é tot; está tamé la confianza en la chen, y los que soz como tú me la fez perdé día par d’atro.

É pordemás… Au, ara díxame está, que se m’enfría el cortau.

 

 

Gobierno de Aragón
gobierno de aragón
GOB ARAGON surge
dph

Dejar respuesta

Please enter your comment!
Please enter your name here