De romería en 1219
Monesterio de San Beturián, foto de Julio Soler Santaló
Adecco

Ya fa 803 años bino una temporada con tal sequera que andaba toda ra chen una miaja alticamada, asinas que dezidión chuntar-se setenta y tantos lugars – entre ellos buena parti de ra nuestra redolada – y fer una romería a san Beturián, en a sobrarbesa montaña de ro Pueyo d’Araguás, una romería que fereba fama durante sieglos. En 1720 Joseph Las Heras publicó un libro que daba fé d’aquella zelebrazión y resumiba  ro que s’abeba escrito asta ixe día, que no yera poco; ra millor esplicazión ye ra que copia y traduze de ro notario de ra Ziudá de Balbastro, Castillón de Palomar:

«Sepan toz os presentes, que en l’año de 1219, reinando ro Siñor Rey Don Chaime en Aragón, y Barzelona, ras Unibersidaz d’Aragón, y Cataluña, congregadas por fer profesions, porque fue en tot ro Reino d’Aragón tanta ra falta d’augua en ista añada, que mieses y ganaus se trobaban acotolaus, chemecaban as chens, y s’aclamaban ta ro Zielo, con tanto espritu, que no solo ayunaban os biellos, os chóbens y ninons, sino que mesmo ros brutos s’aclamaban, ta mober a Dios con istas penas a misericordia, como abeban feito ros Ninibitas. Pero como no s’aplacó brenca ra ira de Dios, muita chen se’n fue, bestida de penitenzia, ta ro Monesterio de San Marín d’Asán, a besitar y benerar o cuerpo de San Beturián Abad y solizitar por a suya interzesión a plebida que tantisma falta feba: asinas lo fizon, y chuntos piadosamén debán de ra Caxa de ro Santo, pidión a ro Siñor Abad Arnaldo, se dinnase tomar l’Arca de San Beturián, y llebar-la con os suyos Monches ta ra Fuen Santa, y que astí la bañase (ziremonia, que por poco grabe, y reberente, bedó ra Sagrada Congregazión de Ritus en 19 de chenero de 1619). Condeszendió l’Abad con as rogarias, y tomando l’Arca, costodia d’aquel tresoro, acompañau de ros Monches, Capellans, Nobles, y Plebeyos, plegón en a Fuen Santa, asperanzaus toz de que abeban de lograr a plebida que pediban de ro Zielo, por os meritos y patrozinio de ro Santo Abad Beturián: Si bien, ta aduyar más a rogaria, fizon toz os Lugars Boto de dar en cada año ras suyas Limosnas a ro Santo, por l’orden que meto contino [entre 74 lugars]:

Franco Molina
MONZON

A Ziudá de Balbastro, una Capa de seda. 8 fanegas de trigo: Selgua y Fantoba. 4 fanegas de trigo: L’Almunia, A Luenga, Torres d’Alcanadre, Pertusa, Abiego, Biarche, Adagüesca, Pozán, Salas Altas y Baxas, Costean, Crexenzán, Castelflorid, Elsón,  O Tormillo, Monesma, Fornillos, Chil, Conchel, A Perdiguera, Peralta d’Alcofea, Lastanosa, Aflor, Peraltilla, Barcabo, Lezina, Torres, Salinas, Morilla, Castarllenas. 3 fanegas: Sarsa y Betorz. 2 fanegas: Uerto, Arcusa, Eripol, Escanilla, Uerto, Castellazo, Murillo de Tou. 1 fanega, Suelbes. 2 arrobas de azeite: Alquezra, Panillo y Boltaña. 1 arroba, Formigales. 30 sueldos: Nabal y Berbegal. 12 sueldos: Castillazuelo y Colungo. 10 sueldos: Puebla de Castro y Mediano. 6 sueldos, Oz. 4 sueldos, O Pueyo.

Asinas se fizo ra obligazión de ditos Lugars, firmada con Boto y Churamento, á ro Glorioso San Beturián; y en pena de faltar a ella, se comprometeban a sí y a ros suyos suzesors fierismas maldizions, y en fuerza d’aquella obligazión, cobra en istos tiempos de bels Lugars o Sacristán Mayor de ro Monesterio de San Beturián ditas cantidaz.

Sintió ro Siñor, por as rogarias de San Beturián, ros rezos y promesas d’istas chens debotas, y fue tal a tamborinada d’augua, y tan estraordinario ro peso de l’Arca de ro Santo, que no pudon mober-la de ra Fuen ni resistir aquel batilazo d’augua: toz os ditos Lugars fuyón escapaus, y desamparón a ro Santo, menos os bezinos de Buil, a quienes en atenzión a iste merito suyo, l’Abad y Capítol, les dión o Pribilechio de lograr l’Arca siempre que la pedisen sin otra obligazión que ra suya palabra…«

De romería en 1219
Pribilechio de 1373 transcrito por Joseph de las Heras en o libro

Contina ra istoria con as cronica d’otros autors, como ro Cronista Mayor de ro Reino, siñor Zurita, que en o sieglo XVI diz que acudión ta San Beturián o primero de mayo de 1219 «…tres mil ombres de ros Lugars d’Aragón y Cataluña, entre Tarragona y ro río Ebro, y d’otras poblazions de zerca de ros Pirineos».

A ra fin, ros semontaneses eslampón cuan caleba, porque poca cosa bale tener a tierra farta y buen tempero si ros que l’han de treballar s’han afogau u esbarrancau por ixas altizas montañas: Trigo, azeite u sueldos pa ro santo, buena tronada y ta casa, que aquí femos a mesma falta que ros cochos en misa y no más cal que ra Candelera tienga quimera de San Beturián y nos lo pague con bella pedregada d’ixas que blincan por San Jorge…

 

 

 

 

GOB ARAGON surge

Dejar respuesta

Please enter your comment!
Please enter your name here