Si tornase yo a nacer,
me i penso que no fería
las cosas como esta vez.
Caldría fer-las al drecho,
que del revés no son guaire
provechosas. Son nomás
rompimientos de cabeza
y barucas al tozuelo
que al esmo te s’ensubinan.
Los menutos y las horas
galean como un llebrel.
El tiempo no tiene tiempo
d’asperar-te, y los años,
como si los acazasen,
fuyen como fan las fuinas
con el galgo.
Yo me i penso
que caldría que te dise
bella cosa. ¡Ay, si yo
m’atrivise, onque seiga
un istante! Bel momento
me valdría si no fuese
tan cobarde. É per ixo
que necesito atra vida
pa espllicar-te que te quiero.
En esta que tiengo ara
las fuerzas no m’acompañan,
y si anda hoi no l’he fei,
no i conto con poder fer-lo.
É cosa de valentía
que me te mire de frente
y, con las cartas ent’alto,
te mostre los sentimientos
que amago. ¡Si yo sabese
cómo dir-te unas pallabras!
En cuentas de dir-te-las
me las callo, y soneo
que te i trovo, y que m’atrivo
a dir-te, dimpués de tanto,
que t’estimo, que t’aprecio,
que t’adoro y que te quiero.
Pero, si no sonease,
mai conto que te las dise.
No’l va fer cuan eram chovens…
Ni sisquiera bel intento
onque no hese cubicau.
Pensar-lo, sí, a palladas,
pero mia, ixo y no res…
Bella vez yo me pllanteo
que si tornase a nacer
antes querría morir-me
que padecer, que’l sofrir
no quiero yo ni veyer-lo,
y sofrir é tenir-te cerca
mientras me muerdo esta llengua
que te habllaría si fuese
más valiente el suyo dueño.
Estoi como encenegau.
No foi más que repetir,
romanciar la mesma historia
seiga en prosa u seiga en verso,
tornar con la burra al trigo
como cuan un revolvino
te s’apodera y te fa
tornar atra vez a lo mesmo.
¿Pa qué i peno?, me pregunto.
Lo que caldría que fese
é dixar-me de monsergas,
que no soi un crío. Creigo
que en cuentas de precupar-me
de las malas consecuencias
habría de fer-me el fuerte y
pillar al toro per los cuernos,
y más pensar en positivo
y menos en desincusas.
Total, ¿qué i puede pasar?
Total, si cuasi estoi muerto.
¿Qué más m’ha de dar que tú
me rechaces? ¿É millor
que per no saber pedir-lo
me i quede yo sin los besos
que querría que me dases?
Los besos digo… ¿Quí sabe?
De mientras, veigo que marchas
y tú veis cómo lloqueo
sin conocer la razón.
Penso que te la feguras,
onque a yo brenca me i vale
si tú tamé callas. Penso
que pa esta vida ya é tarde.
Prefiero asperar-me a l’atra,
remugar to la vergüenza,
tenir-te en el pensamiento,
y mirar de convencer-me
de que he de poder, y de que,
si tornase yo a nacer,
te diría que te quiero.
