Onque encara me fa mal, l’hombro ya’l llevo millor. Me’l va desdologar esllisand-me per las escaleras de la residencia. Lo d’esllisar-me el digo yo, pos no va ser asinas, no. A ixes instantes, é lo que va descurrir de dir. La verdat é que me va tirar yo mesmo a redolons. Querind el va fer, sí. La expllicación cal que se sepa pa que estes casos no se repitan.
Las misachas que treballan aquí no aduben. No’n quieren contratar d’atras per ahorrar-se unos diners, y las pobronas van con la llengua fuera. Corre que te corre d’aquí enta allá, sin un menuto pa parar-se y fer las cosas con cudiau y güena lletra. Nusatros, la chent gran, llevam atra pulítica, y precisam de que mos atiendan a la marcheta. Ya hem galeau asabelo de chovens. Entendez que ellas prou fan, y no tienen culpa de res. La probllemática viene cuan toca de dar-mos las merecinas. Mos dixan ixas pastillotas encima las mesas del comedor, pa que las feigam pasar con bel mueso u con aigua. Manimenos, no vegilan que mos las tomem, y más d’uno se las mete a la pocha y las aventa pe’l váter. Contaz que no toz los tozuelos marchan pas a la hora. Pero ixo no é lo pior; n’hai uno, que’l tiengo fichau, que é más dolent que’l vereno. Pa joder la marrana, va desimuland entre las mesas y cambia las pastillas de puesto. No sé si está grillau u el fa nomás per empreñar. L’han llamau l’atención, pero las zagalas que se’n cudian prou faena tienen como pa estar al tanto, y dimpués pasa lo que i pasa. A unos que les puya la tensión que bel día raventarán, los atros que no fan que pixar perque los enrruna del Seguril que va repllegand per astí, y a los del Sintrom no n’hai tu tía de que les sepan callibrar la dosis, pos tan pronto no’n toman brenca como se’n fartan. No sé cómo no’n pasan más de calamidaz.
Me i penso que a yo tamé me la va chugar. Malas que va comer, va veyer una penícula d’ixas de tiros. Dende’l tellau u dende’l caballo, aquella chent caeba igual que las tordas al cepo. Qué d’animaladas fan astí a la tele; y cllaro, per las escaleras tamé en va baixar alguno. En acabar, marear-me feba. Va jopar enta’l jardín pa ixorear-me una miaja. Manimenos, a metat pasillo va notar que no regiba. Sentiba rudios a las orellas, y las parez me se moveban. A lo que va llegar a la punta, va apaecer un indio per un lateral y me va desparar una fllecha a la tripa. La va agarrar con las dos manos y, endoloriu y a punto desangrar-me, va brincar per aquellas escaleras pa escapar del enemigo.
Las nafras van ser prou talcuals. Al hespital me van posar l’hombro al sitio, y me van dixar handa l’atro día vegilau. Diz que habeba perdiu l’oremus. Cuan va venir a güenas, va tornar a la residencia con el brazo atau pa no mover-lo. Per suerte y milagro, si tenim en cuenta la chugada, los güesos se van salvar d’un estricallo cuasi seguro.
No he queriu denunciar a nenguno, perque no me valdría pa cosa. Va dir que en un descudio me se’n va ir el peu y au, ya pasa per vez. Los míos negocios me los almenistro d’atra traza. Allá’n días me va colar al cuarto ane alzan las pastillas y en va pillar unas que las conozco. Las tomaba el mío cuñau cuan iba restreñiu. Pa purgar, van millor que la saldiguera. Ara se las traga, pensand que le corresponden, el misache ixe que tos comentaba. Lleva una semana que no gasta salut. Miaja católico se le i vei, y fa ben mala cara. Contino ha de ir a tirar’l pantalón. Ganas d’enrredar con las merecinas, conto que no le’n quedan guaires.