L’atro maitino, a casa va sonar el teléfono. Como al zagal y a la choven les tocaba de treballar, per aquí no rodaba nenguno más. Una muller que charraba rarizo, como si hese de ser medio estranjera, me va querir dir que era de Microsol, u no sé qué hostias me va espllicar. Se va ofrecer pa aduyar-me. Se conoce que tenibam el ordenador infestau con un virus prou malismo, y que caleba correr pa acotolar-lo. De primeras, me va venir al esmo cuan sulfataba el polegón de las almendreras u de la parra del güerto. Como no m’acllaraba, le va preguntar si se referiba al ordenador que per un regular está al comedor. Tapoco n’hai pas d’atro. Bella vez, tamé yo el foi marchar. Asinas puedo practicar una miaja. La choven me va apuntar a informática a la Escuela d’Adultos, pa que m’entretenise per las tardes y no estase to’l santo día aquí encerrau.
―A lo que tornen de treballar ya les ne diré, no pase pena, y gracias per avisar-me.
Que parase cuenta, que si no galeaba sería pior. Miedo y tot me va fer. Que si mos robarían las contraseñas, que si se mos borraría lo que teniban a la memoria (pos con la poca que i gasto, va pensar…), que si mos furtarían las perras. ¡Oi, copón! Va fer mención de llamar al zagal al móvil pa alvertir-le del caso, pero la misacha insistiba en tomar una determinación ascape pa que’l estropicio no ise a más. Me va alcordar de que la maestra mos diz que cal tenir ixes trastes ben protegius pa que no te se i metan cucos. Tanto me va amenazar que tremolar feba con el teléfono a la mano, sin saber per áne tirar. Suerte que la muller se va dar cuenta a tiempo y mo’l iba a apañar. Le va preguntar que cómo s’habeba anterau, y de qué mos conoceba. Me va acllarar que con internet se i puede saber lo que pasa per tot tarreu. Ixo tamé mo’l diz la maestra, y ya é güena verdat, ya. Mia, al nieto el tenim estudiant a Londres, y con ixo de las videoconferencias el podem veyer. Qué diferiencia con antes. Cuan llamaba a m’irmano, el que va marchar a Zaragoza, me tocaba de ir a casa la villa, perque allí estaba la gabina con la telefonista.
A la fin, va enchegar el ordenador y le va demandar que me ise dant istrucions, como fa la maestra d’informática. «Ara amortizaré el curso», va pensar yo. Me va endicar que punchase per aquí y per allá, y que le dise unos números que saliban per unas ventanetas. Yo no entendeba res d’aquello, asinas que nomás punchaba ane m’iba dint. Tan fiero me’l va pintar, que me feguraba que anda el tellau se mos afuniría si no le feba caso. Dimpués que paez que se va poder emparellar tot, la muller me va dar las gracias. Tendría que haber-le-ne dau yo a ella per sacar-mos del empantullo, pero no va n’haber manera perque va colgar. Cuan van llegar los zagals les va dar razón y les va dir, ben orgulloso, que no se precupasen, que ya habeba metiu yo mano.
Ara me i paso las tardes veyent la tele y caminant pe’l monte, como fan los de demás. La choven me va desapuntar de las cllases d’informática, y el zagal no me dixa ni arrimar-me al ordenador. De los diners que tenibam al banco, encara no hem podiu recuperar un sacre.