Dende que m’he chubilau, la compra d’entre semana la foi yo. A Marisa encara le quedan un par d’años d’enfermera. Cuan treballabam los dos, pillabam l’auto un sábado per la tarde y mo’n ibam a un sitio d’ixes ane n’hai de tot. Allí, ibam cargant el carro sin entretenir-mos guaire y au, a jopar. Al tenir más tiempo y brenca faena, m’ha dau per furoniar las tiendetas d’al lau de casa como fería un rodabasas.
Fa un par de semanas va dentrar a una frutería que llevan unas misachas d’afuera. Qué’n son de simpaticotas ixas zagalas, y asabelo d’amablles. «Buenos días, siñor», me van dir sin conocer-me. De primeras me va fer la impresión de que fuese más chicorrona, pero é digno de veyer lo que i coge allí endentro. El tienen prou curioso, ordenau per caixas y en capacetas, y tamé n’hai potes y laterío per unos aparadors, ben a mano pa que puedas ir triant tú mesmo. Per variedat no será. Trunfas, espargos, algarchofas…, de tot. Si no trobas bella cosa, de seguida te s’arriman y te sacan de dudas, y en caso de faltar-les-ie, la encargan y al atro día ya te l’han traiu. Conto que si les dise que las bolsas me las ne llevasen a casa, ascape el ferían.
Encara que estasen posaus los precios per tot arreu, no iba fent números de lo que estaba pillant, y al istante de pasar cuentas me va venir una volada como de que me ise a dixar a aquel mostrador la paga de medio mes. Pos no, la verdat seiga dicha. Sí que bel precio era más gran que lo que solebam pagar antes. Manimenos, el chiste está en la calidat. ¡Áne va a parar! El caso va ser que llego a la cocina, el poso tot per la nevera y los almarios y m’aspero a que llegue Marisa pa que dé la sentencia.
Yo, anda que Marisa no ha dau la sentencia, mai sé si he fecho las cosas del drecho u del revés. Ella va fer revisión y me va preguntar lo que m’habeba gastau (qué’n é d’ahorradera esta muller mía), pero no va comentar res.
En los días de dimpués se va acllarar el asunto. Al primer apañijo ya se i va notar. Los tomates sabeban a tomates, lo menos a los tomates que yo me feba al güerto antes de venir-mo-ne a la capital. Y los malacatons, y la esquerola, y tot lo de comer en crudo. Amás, a Marisa, que tiene un paladar que cualquiera se’l sabe d’áne l’habrá sacau, deseguida le van enamorar los aguacates. Yo, d’ixas historias no’n pllantaba y no las entiendo. Lo mío eran digamos las prunas, los porros, las judietas y per astí. Los aguacates, como tos diba, se conoce que saben a aguacate. Contino en está coment; inclluso untar-se-los al pan fa.
M’ha quedau escllatero que, al atro llugar, de verde no i penso tornar a comprar-ne. Si é más caro u no lo’n é tanto se me’n tiene. Como diz Marisa, que de tot en sabe, y d’esto tamé, a toz mos ha de llegar la hora, y allá alto poca falta mos farán las perras. Los zagals ya los tenim esgallinaus, y los nuestros vicios encara no los conozco, conque los dos hem pensau que si sabem desfrutar d’un pllato verdura u de bel palosanto, ya’l tenim tot fecho.