El que no sabe como el que no i vei. L’atro martes, a metat tarde, m’entreteniba veyend la tele. La suelgo posar alta perque tiengo las orellas como un recatillo. A un instante que los de la penícula no diban res, encomenzo a sentir unos chemecs al piso d’alto. A los alquilinos, una parella medio chovenota que han aterrizau fa no guaire, no los teniba trataus. La misacha chemecaba como cuan te dan ixes cólicos que t’encienden. Me va fer dudar si a lo millor serían chent d’ixa expansiva que no tiene horario ni mida pa las cosas del desfogue. Con la pobre Jacinta, que en paz descanse, estes asuntos mos los alministrabam sin fer-mos tanta publlicidat.
Va seguir a lo mío, pero a los cinco menutos siento descutir. Apago la tele y paro cuenta per si podeba descubrir bel embolic. A ratos estroliqueaba nomás ella, pero dimpués era él qui le daba la repulsa. «Jibo, se les ha chirau el negocio». Tamé me va paecer sentir un peano, u a lo millor el va sonear. De primeras aquello era un ara tú, ara yo, pero va llegar un punto que los dos competiban de vez. Ella feba unos ays que paez que se quedase sin aire. Me recordaba a los chilos del tocino cuan el mataban a casa nuestra. Él pegaba unos brams que pa qué. Un bou no hese fei ixe estrapalucio. De lo que diban, no entendeba un sacre. Penso que me se va desparar la tensión, u azúcar. Tan fiero pintaba que va determinar de telefoniar a los ceviles. Atabalau como i estaba, me trafucaba con las tecllas, handa que’n va dar salida.
Les va dir que como no galeasen caldría ir llamand tamé a bella ambulancia. De mientras
llegaban, yo me feguraba a aquellos dos sacand-se los budillos.
Un auto con una sirena a tot meter va frenar de golpe al portal. Los d’alto van callar. «Mau, ya está tot fecho; mañana saldrem al diario». Les va ubrir y al poco, per la mirilla, los veigo galear enta alto. M’asperaba bel somatén, u mesmo bel tiro si el misache se les posaba fllamenco. Cosa. Tapoco va llegar nenguna ambulancia. Con tantas noticias d’ixas que se i veyen al parte, sofocar-me feba de pensar-ie en el panorama que n’habría. Va fer orella. Manimenos, de rudios no se’n sentiban. Una calmota como de tronada me sulsiba.
Lo de dimpués no me’l asperaba.
Trucan a la puerta, m’asomo y me i veigo a los dos ceviles, fend-se la risalleta sin poder-lo desimular, chunto a los vecinos. «Ah, pos no s’han matau». Que cuánto el llamentaban, que no habeban pensau, que no tornaría a pasar.
Ah, y que fese el favor de perdonar-los. Oi, oi, oi, qué aparatos. Tantismo se van
desincusar que, en marchar l’autoridat, los va fer dentrar y les va sacar un café con postres. Astí me van espllicar lo de la ópera. Yo d’ixo no entiendo guaire. Se conoce que al atro día teniban que dar un concierto y, per no sé qué probllemas, habeban teniu que ensayar al piso.
Fa un rato han estau una atra vez aquí. M’han traiu una entrada pa’l teatro y una tarjeta
d’un taxista. Que me quieren convidar per las molestias y que el pagan tot ellos, m’han
dicho. Penso ir-ie. Ara, que el redículo no me’l saca nenguno, y la vergüenza encara me dura.