Chorche Pérez.
Por primer vegada dende que empecipiemos a transición, o 20 d’aviento d’o ya pasau anyo 2015 ocurrió una cosa que fació tremolar a os dos partius politicos mayoritarios en Espanya, o PP y o PSOE: L’aparición de nuevos partius que han convenciu a buena cosa de chent. A resultas d’ixo, bi ha toda mena d’opinions entre os eslectors, dende os que se piensan que isto ye una barrenada de tot porque practicament no ye fesable fer gubierno, dica os que se piensan que iste ye o camín que cal seguir pa acotolar as imposicions unipartidistas. D’ixa traza, y dimpués d’o fracaso que o feito de no haber puesto formar gubierno suposa pa totz os partius, mas que mas pa os que dica agora teneban o poder, o día 26 de chunyo tornaremos a tener unatra vegada eslecions chenerals.
D’una man, a chent que piensan que si no hese emerchiu partius como Podemos y Ciudadanos a cosa iría millor porque levaríanos ya bells meses con un equipo de gubierno, charran d’estabilidat politica y d’o camín d’a moderación pa continar entadebant con a chestión d’o país. D’atra man, a chent que piensan que l’aparición d’os dos nuevos partius debantditos va bien a lo país, charran d’alcuerdos politicos pa plegar en una situación beneficiosa a traviés d’o dialogo.
En ixa busca de l’equilibrio entre a opinión d’os extremistas d’un costau y os d l’atro son estaus os politicos de totz os partius pa no veyer-sen compromesos con unas declaracions que podesen restar-les votos, y ye que os politicos han sufierto bella cosa parellana a una metamorfosi como pasa en totz os periodos de campanya eslectoral; Antis d’a campanya s’adedican a fer as suyas chestions cadagún por a suya cuenta, respetando-sen entre ells en a mida d’o posible anque siempre caiga bell estralazo dende un costau ta l’atro y viceversa. Sin d’embargo, en plegar o periodo de campanya eslectoral, ixa chent que amaneixen en os cartels de totz os puestos d’o territorio con una riseta aforzada y con uellos de corderet pa demandar-nos o voto, esdevienen en un contino charrar d’os atros, criticar tot o posible a chestión d’a resta sin mirar-sen ni sisquiera lo que ells han feito. Prometen a saber-las de cosas que muitas vegadas mesmo ells saben que no meterán en marcha, tractan de desbancar constantment a l’adversario, y mesmo bellas vegadas, fan fateras como mirar d’acercar-sen a la población deixando-sen veyer fendo una gambada solos, caminando u en bicicleta, como si ixo lo fesen totz os días d’a suya vida y a todas horas.
Malas que remata la campanya, ixa chent tornan a sacar-sen a mascareta y a metamorfosi se desfá a escape, tant a prisa como venió; tornan a ficar a bicicleta en o garache, no tornan a fer-sen un paseyo tranquilos sin a companyía d’os suyos escoltas, y prou que sí, se sacan os claus que les tienen o riso de traza constant en a cara. A pregunta ye clara, ¿En veras piensan que fendo ixas cosas a chent va a ir a votar-les?. A respuesta tamién en ye: Sí, lo piensan, y no nomás lo piensan sino que amás en bells casos l’aconsiguen, a memoria d’os sers humans ye muit curta y selectiva como pa alcordar-sen d’o que facioron mal a o prencipio d’a lechislatura, que ye quan os politicos aproveitan a fer as accions mas dolentas pa que dimpués se nos ixuplide quan fagan cosas menos furas en acercar-sen as eslecions chenerals, y no charro de garra partiu concreto, ixo fa parti d’a estratechia de totz.
Amás d’ixo, ye o factor d’a parcialidat que cadagún desembolicamos d’as noticias que amaneixen en os medios de comunicación seguntes os nuestros criterios y as nuestras opinions, y as conclusions que ixo nos fa quitar-ne. ,Soi bien seguro que si os medios de comunicación metesen as declaracions d’os politicos menos conoixius sin decir quí ye o politico u a qué partiu perteneix, totz seríanos mas imparcials y as reunions entre partius serían mas politicas y menos sensacionalistas, y deixaríanos a un costau os sinyals pa centrar-nos en resolver entre totz unicament os problemas que pueda surtir, sin pensar si qui proposa la solución ye d’o PP, d’o PSOE, de Podemos, de Ciudadanos, d’Izquierda Unida, de CHA, d’o PAR u de qualsiquier atro partiu, y sin fer variar a nuestra opinión seguntes ixa condición.
Difuera d’ixe tema, si bella cosa nos han permitiu as eslecions chenerals fallidas, prou que ye o poder veyer a totz os politicos en todas as fases d’a metamorfosi, ye por ixo que yo en tiengo una opinión muit clara: Si privasenos ista vegada a campanya electoral, ya que ya conoixemos a os politicos que bi ha, os ideyals que tienen y as mutacions que les ocurren con ixas cosas, no malfurriaríanos os diners que costa, privaríanos haber d’escuitar os autos con mensaches subliminals por as carreras, veyer os cartels con as caras d’ixas personas, y, de paso, les cabidaríanos tamién a ells haber de metamorfosiar unatra vegada, que de semellant poder que han de fer pa mantener a riseta ben d’estar ya muit cansos, y total, pa la honra que ixo les ha de fer…