La vispra de las vacacions de Navidat, el mío zagal va traer a casa las notas del istituto. ¡Qué sofoquina me i va llevar! Como no era el caso de pasar dos semanas con el morro torciu de mientras mos comebam los llamins y febam como que celebrabam quémesio qué, al mío home no le va nombrar res. El zagal tapoco va sacar el tema, y yo va determinar de asperar a enero pa acllarar-lo tot.
Ayer tarde va tenir reunión con la tutora. Me va citar a ixo de las cuatro. Puntual como Hacienda cuan te tiene que cobrar, allí feba tiempo yo con las notas a la mano. Me va fer dentrar a un cuartet no más gran que’l que emplleo a casa pa pllanchar. No la conoceba a ixa misacha; ni me pena. Cuasi sin dixar-me dir ni esta boca é mía, ya va encomenzar ella a sacar desencusas. Se conoce que habeba estau estudiant el caso y llevaba la retrólica preparada.
Me va espllicar que cllaro, que si esto, que si l’atro, que si ent’alto, que si ent’abaix. Oi, redeu, qué matraca de muller, con lo chovenota que é encara. Pa que no me fese perder el tiempo, que los agüelos no perdonan la brenda, le va dir que nomás queriba saber lo de las notas. Astí se le va tensar una miaja la esquena. Va pillar una carpeta que teniba a la mesa y va ir enseñant-me un borguil de papels con anotacions, esquemas y cualsiquiera sabe lo que n’habeba allí escrito.
De cada asignatura, teniba apuntadas las notas de toz los esamens y ejercicios que feba el zagal; tamé si llevaba la faena fecha, si preguntaba bella duda, si se llevantaba a pixar… Pa yo que’l gubierno no’n maneja tanta d’información. A la fin, lo que me va querir dir é que tapoco era tan grave que n’hese suspendiu tres d’asignaturas, perque n’habeba que entender que a ixas edaz los celebros encara no están guaire formaus. Tot esto me’l diba disculpant-se, como qui pide perdón dimpués de fer un mal. De primeras, no va saber cómo tomar-me-lo. Encara estaba esturdida mirant d’estomagar lo de los perfils de salida, los descriptors, las situacions d’aprendizaje, y no sé qué más tontadas que me va dir, me penso que en inglés.
¿cómo podeba ser que solo le’n hesen quedau tres si no pilla un llibro ni onque’l maten?
Pa posar las cosas a las cllaras, va tomar el mando de la conversa y le va preguntar que cómo podeba ser que solo le’n hesen quedau tres si no pilla un llibro ni onque’l maten. Per casa está to’l santo día enganchau al móvil, y a lo que’l vienen a ensorronar los de la cuadrilla y m’escudio, ya ha jopau a la calle. Prou faena tiengo como pa estar encima d’él, y con su pare no se i puede contar. Cómo tos ha sabiu tomar la mida a toz, le va dir yo a la maestra. Este, en cuanto s’ha dau cuenta de que sin fer res igual aproba, ha dixau d’estudiar. No sé pa qué tanto papel y tanto controlar, si no les esigiz un sacre. Pa perder el tiempo no cal ir al istituto. Si tenise la edat, el mandaba con su pare, que se i pasa la vida per ixes mundos con el cambión. Lo menos, astí aprendería lo que é treballar.
Ella cuasi no sabeba per áne le veniba l’aire. Habeba creiu que queriba gritar-le per haber-lo suspendiu. Bai, le va dir yo; lo que no sé é cómo l’habez aprobau las atras. Pobres zagals, menudo futuro se les aspera.