María Jesús Murillo
En a identidá d’una presona adentra chenero, raza, clase sozial, cultura, edá, secso, entre atras muitas custions. Todas s’achuntan ta definir un ser chenuino, pero tamién mos ampramos belunas como estachers d’un rolde. A debantadera d’a identidá tanto indibidual como coleutiba, ye una d’as funzions alazetals d’o luengache.
A luenga que femos serbir fixa a nuestra ambista d’o mundo. Ye a que mos da ra nuestra particular uellada d’a reyalidá, perque alazeta l’esmo que refirma a suya terminolochía.
O conzeuto que tenemos de cualsiquier aspeuto ba soldau a o sinnificau d’a parola que emplegamos ta zeñar-la. As parolas debuxan a nuestra traza de pensar.
A luenga no ye, nomás una mena de comunicazión, ye un tarabidau sozial, ye un binclo de simbolos que enreliga a ra comunidá que comparte o mesmo codigo. Ye una carauteristica que trasmite a cultura de chens e lis ampra radizes particulars que las esferenzian d’a resta.
Charrar de una traza mos fa más fázil a bida en o tocán a ras relazions con o nuestro rolde amanau. L’adautazión lingüística cal capir-la como parti d’o istinto de sobrebibencia.
A esferenzia lingüistica ye d’a man d’o prozeso d’esferenziazión istorica, etnica e cultural. Una presona argüellosa e identificada con a suya colla no pas mirará d’amagar u forachitar rasgos d’a suya fabla, d’atra man, prebará de refirmar-los.
As presonas prenen una autitú positiba enta una luenga pendendo de muitos fautors, seguntes a fin que encorra, pero, en a mesma mida en que una comunidá esfiende os suyos costumbres, mitos, tradizions, sistemas de baluras, azeuta e refirma a suya identidá e asinas ha de tener en altera estima a ra suya luenga.
A nuestra luenga, como fautor de identidá, mos liga a o pasau y empenta o esdebenidero. Mos emos deseparau d’as nuestras radizes, per cada diya se fan más grans as distanzias chenerazionals. Os lolos no pas fan como dinantes o treballo de culturizar a os suyos nietez. Cada begada son menos as casas en as que se amuestran os costumbres, afeutadas tamien per os nueus modelos de familias en as que as relazions tien embolicadas estruturas.
Esfender a nuestra luenga ye esfener una traza de beyer a bida, una identidá cultural que ba dillá d’o lingüistico e abraca os más esferens aspeutos d’a nuestra comunidá sozial. No pas emos de cayer en o purismo barucoso, pero tampoco no en a indolenzia, que remate per acotolar y esboldregar os repuis de l’aragonés, a luenga que eredemos d’os nuestros abanpasaus, que mos liga e identifica con o nuestro territorio, en balors ampraus y en ochetibos enta l’esdebenidero.