“Mai, mira-me as mans;
las trayo buedas,
lasas d’amar…
son dos alas d’un biello pardal
que no puet
sisquiera volar…”
Istos bersos que tan familiars mos suenan, per aber-los leiu tantas begadas, u per aber-los sentiu cantar a Gabriel Sopeña, a Labordeta, a Olga y los Ministriles u a nusatros mesmos, ban en un llibret de poesía de fa més de cuarenta años (denguno no el diría per lo frescos que suenan) que agora torna a la bida, si ye que bel día ba morir.
Ixo que a primers de 2016 eban secretos a escuchetes, se ba fer realidat antes de final d’año. A la fin saliba una nueba edizión de “No deixez morir a mía voz”, d’Ánchel Conte, uno d’es llibros seminals de l’aragonés literario moderno. La sorpresa ba tirar entadebant grazias a’l mesmo autor, que en teniba prou ganas, y la editorial de Zaragoza Los libros d’el gato negro (2016), que ya n’eba publlicau una buena repllega de poemas rezients, “Luna que no ye luna”.
Con una repasadeta a bels datos biográficos d’Ánchel Conte tendrem las primeras endrezeras cara ta conoixer es orichens d’el poemario reeditau. Ánchel conte ye naixiu d’Alcoleya de Zinca (Zinca Meya) (1942). Es primers contautos d’Ánchel Conte con la llengua nuestra vienen d’el bagache lingüistico de la suya familia, espezialment d’es suyos lolos. Un Conte ninón y adoleszent descubre parolas sueltas y espresions que reconoixerá dimpués en las fabllas bibas de l’alto Aragón. Fa estudios secundarios y unibersitarios entre Uesca, Barcelona y Zaragoza, y ya como profesor de secundaria marcha destinau a’l nuebo Instituto de Enseñanza Libre Adoptada de l’Aínsa (güe IES Sobrarbe) en 1966.
La suya bisión adelantada de la pedagochía cunde en l’alumnalla. Son zagals y zagalas de la biella capital sobrarbesa y la suya redolada, y un poquet més entallá. Ánchel rezibe d’ells una llengua y una cultura que él achunta con l’erenzio d’es suyos lolos, y fa beyer a estudiants y familias la oportunidat de reibindicar la dinnidá d’el suyo entorno y el suyo bagache soziocultural. Como mos fa alcordar Chusé Raúl Usón en el prelogo de la nueba edizión de “No deixez morir…”, Conte “s’implica en totas e cadaguna de las causas d’aquel País”. Empllega l’aragonés en las cllases, espienta el grupo folklorico Biello Sobrarbe, recorre toz es mons de la redolada y empeza a atribir-se a escribir cuentez como “A yaya Andresa”, que beyerá publlicaus en rebistas altoaragonesas com o “Argensola”.
Pero chunto a totas istas alegrías combibe la soledat d’el bardo d’Alcoleya, que bibe en el suyo interior el suyo pensamiento politico ya asentau y la suya sexualidat reprimius en aquells tiempos en que “Franchón” (asina le diban en el mío llugar) encara mandaba y muito. Es bersos ban dibuixán las tardes y nueis de calma y tristura en la suya cambra de la fonda Sánchez, bersos que ya ban amanixén en la llengua d’es suyos lolos, d’es suyos bezins y alumnos y d’es poetas d’antesmás, que será ya pa cutio la suya llengua.
Entre 1968 y 1971 Ánchel Conte ya alza cuasi toz es poemas en berso y en prosa que conformaran “No deixez morir a mía boz”, y mientres Francho Nagore (a qui conoixerá lluego y con qui achuntará poders en fabor de l’aragonés) conseguiba publlicar la suya poesía en Uesca (“Sospiros de l’aire”, 1971), Ánchel los fa allegar a José Antonio Labordeta. El en ixos tiempos cantautor nuebo, dimpués de leyer-los d’alto entabaix, ba dir que caleba publlicar-los. Es ba alcanzar a l’editor catalán José Batlló, (més entabant amo de la librería Taifa de Gràcia), que ya eba editau obra d’el y d’el suyo chirmán Miguel. En Pep de Caldes (asina conoixiu en Barcelona per ser naixiu de Caldes de Montbui) ba dezidir ascape incluir-los en la més que prestichiosa colezión de poesía El bardo.
Y, como acostumbran a dir, el resto ye istoria. “No deixez morir a mía voz”, chunto con “Sospiros de l’aire” y “Garba y augua” (Zaragoza, 1976) d’Eduardo Vicente de Vera (que tamé ba brindar la impresionant nobela “As fuellas de París”), marca l’emprenzipie d’una renaixedura literaria de l’aragonés, dende la poesía. Y ixo sin tallar brenca con es antezedents dialectals de la primer metá d’el siegllo XX (Veremundo, Baldomera…), sino que ubre la llengua a totas las posibilidaz d’espresión de sentimientos, dende es més personals dica es més coleutibos, a penar de ser una llengua minorizada y en perigllo de desaparixer. La reibindicazión de la llengua ba, pues, achuntada con lo més intimo.
Ixa primer edizión d’El bardo ya fa años que ye oixeto de rechiras imposiblles en las llibrerías de colezionismo. La segunda, de 1986 (CFA, Uesca) lleba tamé prou tiempo acotolada. Po que se’n troben encara eixempllars de la terzera, en bersión trilingüe aragonés-castellano-ruso (CFA, 2002). Pero Ánchel, la llengua aragonesa y nusatros que mai no en tenim prou, de la suya poesía, mereixeban ista cuarta edizión. Pinchisma, en bersión bilingüe aragonés-castellano y una portalada polidisma de la zaragozana Cristina Guallart presentán un buen calzero de montañero. L’editor de la primer edizión, José Batlló ba morir chusto cuan ya saliban de la imprenta es primers eixempllars. Per ixo Conte quiere adedicar con emozión el poemario a él y a Labordeta, que tamé se mos n’ha iu.
Cuan Ánchel conte demandaba “No deixez morir a mía voz” ya sabeba que ixa boz eba d’el pero tamé de toz, la llengua aragonesa, la llengua nuestra. Asina, biba, a penar de cansa y meyo acotolada, ha llegau dica aquí. L’hem feit caso a Ánchel y le’n seguirem fen.