“Charrar ta no callar”
Exposición de Cristina Raso Boluda
Texto d’introdución: Chorche Pueyo
Traducions: Bomboloniar
Enmarcata en a IV Trobada d’Aragonés d’Alquezra
A localidat d’Alquezra acullirá, entre o 6 de diciembre y o 10 de chinero, a exposición “Charrar ta no callar”, un treballo fotografico y reflexivo de Cristina Raso Boluda feito y pensau expresament ta ra IV Trobada d’Aragonés d’Alquezra, y que se zarrará dentro d’a mesma trobada o día 10 de chinero, fendo parti d’as suyas actividatz.
A Trobada d’Aragonés ye un espacio en o que l’aragonés s’emplega como ferramienta ta mirar o mundo y ta mirar-nos nusatros mesmos, seguindo l’esprito que clamaba Anchel Conte: “tornar a luenga ta ra chen, ta que beiga que no ye basta ni fiera e que bale ta esprisar totas as manifestazions d’a bida”. Iste esprito ye tamién en l’esmo d’a exposición, metendo-ie en a suya balura l’aragonés a traviés d’a fotografía, d’a memoria, d’a cultura y d’a vida d’o territorio.
A exposición ranca d’una ideya alacetal: una luenga ye una traza de vida. No ye nomás una ferramienta de comunicación, sino una mena de pensar, una bastida cultural, una memoria compartita y una esencia comunal. Como se diz en a exposición: “En una luenga trobamos codificatos os conoiximientos que os suyos fablans han iu retabillando en sieglos” (Carme Junyent).
Cristina Raso Boluda retrata mans, paisaches, oficios y ambiestas d’o día a día t’amostrar que a luenga vive en as presonas y en os suyos actos. A exposición ye refirmata por a UNESCO que’n 2003 aprevinió que “o 90% d’as luengas que se fablan en o mundo son en as tres piedretas”, una alvertencia que ye en l’alacet d’a propuesta.
L’autora siñala que a desaparición d’una luenga ye tamién a desaparición d’una traza de capir o mundo, d’una autoestima colectiva y d’una libertat. Como amaneixe en a exposición: “Bribar o lumero d’as luengas e rematar fablando toz a mesma, ye empobrir-nos… Ye fer-nos más gobernables” (Carme Junyent).
Per ixo, “Charrar ta no callar” ye una clamata t’os fablans d’a luenga aragonesa y tamién ta qui encara no la charra: aprender, emplegar, sentir y esparder a luenga: “Manimenos, pa aconseguir ixo, l’atra barrera a superar é la vergüenya de charrar la nuestra llengua, el miedo a no fer servir el vocabulario, la gramatica u la grafia mes correctas. Pero cal parllar-la perque la unica llengua mal charrada é la que no se fa servir pas.” (Jorge Pueyo Sanz).
A inauguración será o 6 de diciembre á ras 19:00, y a exposición podrá veyer-se en a Escuela Refuchio d’Alquezra dica o 10 de chinero de 2026, d’as 9:00 t’as 22:00. A rematadura fera parti d’os actos d’a IV Trobada d’Aragonés d’Alquezra.
Ta que una luenga viva, s’ha de charrar.
Charrar ta no callar. Charrar ta resistir.