Andrea Fenero Calvo
Ya fa más d’un mes dende que tot o mundo portió á Nelson Mandela, Madiba, como estió nombrato en o suyo clan o Tata.
Un adieus imposible de xuplidar per a tristura que plenó tot o globo, e ye que a bita d’iste expresidén d’a Republica Sudafricana, dende a suya naxedura o 18 de chulio de 1918, estió un tuerto camín dezaga d’a libertá e igualdá. A luita alazetal d’iste politico e abogato estió cuentra l’apartheid (politica de traspelanza razial), causa que lo nimbió enta ra garchola per 27 añatas; ya que, encara que en primeras compromeso con l’aizión no biolenta, treballó activamén en marratas e plans d’autibidaz d’o frontinazo armato. En 1962, zeñato como terrorista y enculpato per enzurizar á ra bada de treballadors, ye engarcholato en Johannesburgo y enrrellato ta cutio.
En a fosqueta, bibindo en condizions cacanas (per estar negro e preso politico, o pior tranco), Mandela e a suya luita son un exemplo a ran mundial e muitas autoridaz politicas locals e internazionals demandan a suya liberazión ascape. Manimenos, a suya surtita en libertá no ye arribata dica febrero de 1990.
Tres añatas abán li se dona o Premio Nobel d’a Paz (amprato con o presidén De Klerk, qui lo posó en libertá), e una añata más tardi –en 1994- ye trucato en o primer Presidén negro de Sudafrica. En rematar o suyo exerzizio, 1999, amarguinó a bita politica e añatas dimpués, en 2004, a publica.
Os suyos autos e luitas per a igualdá razial son conoxitos de punta ta coda e asinas estió reflexato en as parolas de milenta de presonaches d’o mundo d’a cultura, o esporte e, a más a más, a politica, que dexón o suyo mensache de duelos e reconoxedura. Mariano Rajoy dizió de Madiba que dexaba un mensache de “ansia de libertá” e que ta el “Mandela ye una mestura guallarda de peitera en os suyos ideyals e cabida de renconziliazión”; e so firme que ye asinas.
Manimenos, si Mandela ese bibito en España continarba estando zeñato como malfeitor, profés á diya de uei. Ya que diyas antis d’a suya fenezedura, o Consello de Ministros adempribiaba o borrador d’o abanprocheuto de Lai per a Protezión d’a Seguranza Ziudadana, empentato per o nuestro Ministro d’Interior Jorge Fernández Díaz.
Iste abanprocheuto tien como malalzau muito grau, entre atros, “A conbocatoria per cualsiquier meyo o l’asistenzia a cualsiquier sitio u manifestación, con una fin coautiba (…)”, “Os sitios u manifestazións no ditas o biedatas en puestos que tiengan a considerazión d’infraestruturas criticas (…)”; lo que poderba estar piñoras dende 30.001€ dica 600.000€. Charrando d’infrazions graus zeña, per exemplo, “O estorbo d’a seguranza ziudadana que se faya con enchaquia de roldes frén á ras siedes d’o Congreso d’os Diputatos, o Senato e as Asambleyas Lechislatibas d’as comunidaz autonomas, encara que no estiesen reunitos(…)”, “Fer roldes u manifestazions en puestos comunals portiando armas u ainas durencas capables de fer mal(…) asinas como a negatiba á deluyir reunions e manisfestazions en puestos comunals manduquiatas per l’autoridá competén (…)”; e isto estarba dende 1.001€ dica 30.000€ de piñora.
Per o que ye platero que as manifestazions en as que Mandela yera autibamén le esen suposato, á diya de uei, una deuda prou importán. Manimenos, qui enfila istas midas abanta ra suya enrestita e luita.
Que cadagún faya a suya reflesión e per aduyar, en ista web bi ye dito borrador sobre a lai de “seguranza” ziudadana: